యూఏఈలో ఐపీఎల్ నిర్వహించనున్న వేళ.. ఫ్రాంచైజీలకు మార్గదర్శకాలు సూచించింది బీసీసీఐ. ఈ క్రమంలోనే కరోనా వ్యాప్తి నేపథ్యంలో ఆటగాళ్లు పాటించాల్సిన భద్రతా ప్రమాణాలకు సంబంధించి ఓ లిస్టు ఏర్పాటు చేసింది. స్వదేశం నుంచి బయలుదేరిన మొదలు టోర్నమెంటులో చివరి బంతి పడే వరకు ఈ నిబంధనలు తప్పనిసరిగా పాటించాలని పేర్కొంది.
ఇందులో భాగంగా లక్షణాలు లేని కొవిడ్ కేసులను తగ్గించేందుకు ఐపీఎల్ జరిగినన్ని రోజులు క్రమం తప్పకుండా పరీక్షలు చేయనున్నట్లు స్పష్టం చేసింది. వీటితో పాటు ఫ్రాంచైజీలు వేర్వేరు హోటళ్లలో బస చేయడం, డ్రెస్సింగ్ రూమ్ల్లో భౌతిక దూరం పాటించడం, ఎలక్ట్రానిక్ టీమ్ షీట్లు, వర్చువల్ టీమ్ సమావేశాలు తదితర మార్గదర్శకాలను అనుసరించాలని ఆదేశించింది.
ఫ్యామిలీలు రావొచ్చు..
క్రీడాకారుల కుటుంబ సభ్యులు యూఏఈకి ప్రయాణించడంపై ఎటువంటి నిషేధం లేదని బీసీసీఐ స్పష్టం చేసింది. అయితే, ఆటగాళ్లు, సహాయక సిబ్బంది ప్రోటోకాల్స్ను తప్పనిసరిగా పాటించేలా సంబంధిత ఫ్రాంచైజీలు చూసుకోవాలని పేర్కొంది.
సెప్టెంబరు 19న యూఏఈ వేదికగా ఐపీఎల్ ప్రారంభం కానుంది. చివరి మ్యాచ్ నవంబరు 10న జరగనుంది.
